مرة 4 مليارات
لأ هوَنا مليار ونص
البنوك بس
لأ الشركات الاستثمارية المليئة بعد
تسعة وتسعين شركة استثمارية
ثلاثين منهم بالكثير شركات
والباقي دكاكين عندهم كم محفظة يديرونها وياخذون عليها نسبة
عندي سؤال.. المحافظ من صجه ولا يتغشمر؟
كل يوم اهو والشمالي طالعين لنا بكلام متناقض عن اليوم اللي قبله
الظاهر كلامهم زبدة تطلع عليه الشمس يسيح
ترى دخنا من كمية وتنوع التصريحات المتناقضة
دخنا و تعبنا و فلّسنا
وزير المالية الأمريكي قال تصريح غير مناسب اثر على السوق يوم واحد
قامت عليه القيامة بأمريكا
واحنا ماشين على مبدأ الديمقراطية المتحضرة القائل
اذا نجلت السوق خير يا طير؟
(نجلت: كلمة كويتية بمعنى قلبت أو جبت عاليها واطيها)
والنواااااااااااااااااب ماعندي كلام أقوله غير حسبي الله ونعم الوكيل على بعضهم
طيحوا القروض عن المواطنين نوافقلكم على مشروع الانقاذ الاقتصادي
كل هذا حقد على تجار الكويت خنطيح شركاتهم ونخسرهم ونجيب خشومهم الأرض
يعني اذا القطاع الخاص انهار و أسعار البترول نازله أكثر من 60% بالله عليكم الكويت اشبقى باقتصادها؟؟
علشان لا ينفهم الموضوع غلط.. آنا لست ضد مساعدة الشعب و أهلها أولى بخيرها بس مو بهالوقت
ومو علشان واحد رهن بيته علشان يضارب بالسوق نربط موضوعه بموضوع انهيار اقتصاد دولة بأكملها
والغريبة استجواب حدس اللي داش بالنص! التوقيت صدفه؟ واشمعنى بعد 6 أسابيع؟
خو صارلهم من المجلس اللي فات واهم بيستجوبون يعني ما عندهم الاسئلة والمحاور توهم بيفكرون فيهاا؟
وتعالوا بسألكم.. شنو دور غرفة التجارة؟؟ ما أشوفهم سوو شي
وكأن الموضوع ماله علاقه فيهم بالمرة
على قولة واحد كان يصوت لهم أثبتوا بجدارة فشلهم بالازمات
وين اللوبي الاقتصادي؟ هم ما عندنا!! الشكوى لله
و الله يحفظه لا ينبس ببنت شفة
المهم ودي أعرف الديرة وين رايحه؟ و منوالربَان؟ في أمل ولا تخبطنا بكل شي بيكون للأبد؟
تعبنا من كمية الغباء والاستغباء اللي منتشرة بين متخذي القرارات الاقتصادية و السياسية
ومن كثر المناقشات و اللف والعجن والتحليل لأمورنا التي تفتقر للمنطقية في أغلبها صار شكلي جذي
والمغزى.. اصحوا يا نايمين ترى الطوفان الجاي بياكل الخضر واليابس اذا ماتحركنا بسرعة..
اللي حتى ميزانية الدولة خفضوها 25% والمجلس وافق عليها بخمس دقايق
تخيلوا لو الحكومة تفنش موظفي البطالة المقنعه بدل تخفيض الميزانية.. وايد أوفر وأجدى
2 comments:
عجييييييييييييييييييييييييب
باجر يحطون بلوقج بالقبس ’؛ وصلني بالايميل وقلت خنشوف شالسالفه بس عن جد خوش كلام يا قماشه بالتوفيج
عنبر أخو بلال
Post a Comment