كنت في الأفينيوز مع اعيالي و أختي رايحين عندنا غرض بنستلمه
طبعا كالعاده زحمه و مناظر عجيييييييييييبة
كلكم عارفينها مالا داعي أسردها
على سبيل المثال وليس الحصر:
الحجابات الطايرة والقذله الناطه
والنفانيف الميكروجيب عبالهم J-Lo
والشباب شورتات نص شبر والكراعين جلحه ملحه
وتسريحاتهم اللي تخرع جنهم مكهربين!!!
المهم شفت فيلم جدامي في القهوة باختصار
شباب قاعدين يسولفون وبنات على الطاولة اللي يمهم
الشباب يطالعون البنات لأن فعلا شكلهم ملفت للنظر من اللبس والمكياج
والبنات يوزعون ابتسامات مبتذله
الشباب استحو وبطلو خز
البنات شكلو عليهم خز وابتسامات مريبه
مادري ليش حزتها قعدت أفكر "يا هل ترى هذي الظواهر الدخيلة عالمجتمع؟"
اللي حطولها لجنة سموها لظس؟؟
من جهة أخرى تذكرت أيام المراهقة وهالأبيات
لما كان دايم السيف شاعري المفضل
يامدور الهين
يامدوَّر الهيَّن ترى الكايـد أحلـى
وأسأل مغنِّي كايـدات الطَّـروقِ
الزَّين غالي لكـن الأزيـن أغلـى
ولكل شـرَّايٍ بضاعـه وسـوقِ
النَّو عالي والسّمـا فوقـه اعلـى
ولى فاق علمٍ جـاه علـمٍ يفـوقِ
الصَّعب هلاَّ قلت ياصعب سهـلا
دامك تبيني فانت ياصعب شوقـي
أحب أعسف المهرة الَّلـي تغلَّـى
واحب اروَّض كل طـرفٍ يمـوقِ
احب أسافر مـع سحـابٍ تعلَّـى
واحب فوق الغيـم لمـع البـروقِ
واحب اساهر بدري الَّلـي تجلَّـى
وارسم شعاع الشَّمس عند الشَّروقِ
يامن علـى ثايـر فـؤادي تولَّـى
خلَّك على قلب الكرامـه شفـوقِ
أكرم عزيزٍ بالعمـر مـا استـذلاَّ
يسوق عمره للمشاريـف سـوقِ
إخترتك من النَّاس للقلـب خـلاَّ
ياحيثك مرادي وكيفـي وذوقـي
مارحـت ادوَّر كـل زولٍ تحلَّـى
لولاك تسوى ماعطيتك خفوقـي
خالد الفيصل
2 comments:
شعووور مكهربه .. ألوان غريبه !!
هالشي قام يتجذر باليهال وانا اخوج ،، الحمد لله والشكر . الشرهه على الأهل اللي ما يوجهوون عيالهم .
وصح لسانج ولسان خالد الفيصل :)
الحب يطلع على بذره..
ومن قال يا the.thinker :)
Post a Comment